生活分享

【杜拜生活】活在焗爐裡的這些年(上)

杜拜天氣有幾熱?好似一個焗爐咁囉!出街迎面吹嚟嘅風,感覺就好似用緊風筒吹住自己塊面咁。

Cherry
Cherry
發佈
6/18/2021
9/5/2020
【杜拜生活】活在焗爐裡的這些年(上)

   喺嚟杜拜生活之前,其實我對中東嘅認識真係少得可憐。即使係自己做妹仔果間阿聯酋航空公司我都只係聽過一兩次。(了解比較多嘅都係國泰嘛,歐洲直航,真係唔知杜拜其實係一個轉機熱點。)連杜拜原來熱到喊,我都係嚟之前無耐先知。記得我曾經問過一位杜拜生活嘅朋友,杜拜係咪真係咁熱?杜拜究竟可以去到幾熱??佢答我:「有幾熱啊?好似一個焗爐咁囉!出街迎面吹嚟嘅風,感覺就好似用緊風筒吹住自己塊面咁~!」我點點頭,明嘅,但又難以想像。直到真係住落咗,夏天來臨嘅時候,我總係用呢句「哇!熱死人啦!」嚟迎接杜拜嘅夏天。

 

   每年十月尾至四月頭係杜拜嘅“冬天”,氣溫宜人,係嚟杜拜度假嘅好時機!日間氣溫介乎24-30度,夜間氣溫最低係可以去到14度!!每逢冬天,都會有好多嚟自世界各地嘅遊客專程嚟享受陽光與海灘,尤其係歐洲同俄羅斯。其餘月份就係杜拜嘅夏天,最熱係7、8月,今年最高溫度有47度,晚間最低就大概係25度。聽落真係好嚇人,不過我想同大家講,其實還好,真的還好!

  所謂還好,其實係因為香港嘅「熱」真的不亞於杜拜嘅「熱」,這個比較不是從氣溫表上的數字來看。大家都知道,香港嘅夏天事實上是很酷熱難耐的,氣溫高,濕度高,穿梭在石屎森林間,常常感覺密不透風。而且人口密集,人多車多廢氣多,更加令人覺得很侷促。平日返工行去巴士站/地鐵站嘅數分鐘路程已經汗流浹背。而杜拜,熱還熱,但係因為地鐵和巴士路線不及香港咁發達,所以好多人出行都會選擇搭的士或者係自己揸車(杜拜買車同養車嘅成本比香港低好多,下次有機會講下!)。再者,唔好忘記成個城市/國家一輩子都同個「熱」字打交道,對策自然少不了。例如,基本上每個大型商場都係連接地鐵站,一出地鐵站,沿著冷氣行人天橋直入,一滴汗都唔使出;日常生活買餸食飯,一個手機app就幫到你;此外不少嘅娛樂設施都係室內,夏季要喺烈日下暴曬嘅機率真係無香港咁高。除非你好似鬼仔鬼妹咁鍾意陽光與海灘,去沙灘曬一曬就真係幾甘下嘅。不過認真,真係曬嘅,去酒店pool喥曬,好多五星級酒店唔會收你入場費,只要場內飲食消費滿200~300港紙就可以。

   所以話,杜拜嘅熱,因為生活習慣同其城市嘅便利程度係可以令人對佢有多點兒容忍。男友話,佢呢世人抵受過最難頂嘅熱唔係喺杜拜,而係喺美國拉斯維加斯,拉斯維加斯嘅熱係刺熱、滾燙的。我未去過,所以不予置評。

 

  題外話一則,之前住公司宿舍,扣除飛咗嘅日子,一年160日,我開冷氣嘅日數真係十隻手指數得曬。唔好問我點解,我都解釋唔到。我住六樓,相鄰有座建築物阻擋大部分陽光,間房同個廳朝早9-12點先會有啲陽光照到。而且宿舍無得開窗,平時嘅氧氣來源大概係嚟自我嗰十棵植物,同從大門透入的少許冷氣。唔開冷氣係有少少侷嘅,但真係開咗又好凍wor(舊式中央冷氣,得風同冷氣,無得校溫度),再嚟我覺得冷氣吹出嚟嘅風唔乾淨,即使無開冷氣,無開窗,屋企啲傢俬都好易積塵,開咗冷氣就更加唔使講。所以,我同室友都係煮餸時先會開冷氣,睡房就長期零冷氣。有時瞓覺前會開10分鐘,然後用小米空氣清新機,基本上就安睡到天明啦!

    有關杜拜嘅天氣,我最想講嘅其實唔係佢嘅「熱」,不過我留返下集先再話俾大家知!

體感溫度55度問你怕未!
嚟到杜拜,一定要參加沙漠一日遊. 然後當然少不了一張沙漠呃like相!
Cherry
杜拜代表
|
海外特派專員

移居杜拜四年有多,曾任職中東航空公司機艙服務員。 鍾意飲飲食食,四處遊歷。喜歡同人交流,學習不同嘅文化。

更多情報

未知想移民去邊?

聯絡移民顧問傾下